Zgjidhet problemi i furnizimit me energji elektrike për plazhin e Velipojës. Kjo po bëhet e mundur në sajë të instalimit të një transformatori 20 megavat (është në përfundim e sipër) në nënstacionin Shkodra 2. Me vendosjen e tij, OSSH (Operatori i Sistemit të Shpërndarjes) premton se do ketë 24 orë furnizim me drita për zonën e Velipojës gjatë gjithë sezonit turistik. Me ndryshimin e transformatorëve nga 10 megavat në 20 megavat, e gjithë zona e Nënshkodrës që përfshin 3 komuna: Velipojën, Dajç-Bregu i Bunës; Ana e Malit dhe fshati Trush i Komunës së Bërdicës nuk do të kenë më probleme për sa i përket furnizimit me energji elektrike, të paktën gjatë sezonit turistik. Gjatë vitit të kaluar, në këto komuna ka qenë shumë problem ngarkesa në rrjetin e energjisë, e cila çonte në ndërprerje të furnizimit të banorëve me drita. Për të zgjidhur këtë problem është dhënë një fond prej 12 milionë lekësh. Aktualisht, ky investim është drejt përfundimit dhe është përqendruar në riparimin e linjës. Nëndrejtori i Operatorit të Sistemit të Shpërndarjes, Xhovani Roveli pohon se deri në fillim të sezonit do kryejnë të gjitha punimet dhe pushuesit, gjatë sezonit turistik do kenë një furnizim pa ndërprerje me energji elektrike për 24 orë. Në nënstacionin e Velipojës do ndryshohen edhe dy transformatorët ekzistues 1.8 megavat, me një të ri prej 5.2 megavatësh, i cili i bashkohet edhe një tjetri 3.8 megavat. Këto investime do të jenë më se të mjaftueshme për furnizimin me energji elektrike pa ndërprerje për zonën turistike.

Gazeta Shqiptare / 14 Maj 2008